Dooh ka Ri-loom Jaiñtia ya uwi na ki khroo pyrkhat yong ka puræ puthi hei ktien Pnar  – Wyrta

Man ko ka khubor wa sñiawsih wei doohnong wa khroo ya ka Ri-loom Jaiñtia kamjooh ya ka jylla waroh kawi heiwa u waheh S. Quotient Sumer uwi na ki khroo pyrkhat yong i thoh kot hei ktien Pnar kamjooh u thoh kot wa bna naam ka Bri u Ynñiawtrep Ynñiawskum da ieh syndet u yeini i pyrthai chongwasa ha ka 30 tarik Kmaichonglad 2022 hei rta wa 89 snem.

U S. Quotient Sumer toh u khon ka Synchar Sumer wa u Chanmon Challam kiwa da Baamkwai ha Dwar u Blai, uwa na ka dong Panaliar wei da kha ya oo ha ka 24 Kmaichonglad 1933 wei man u u bru wa emsap hei wow pynmih ya ki kot hei ktien Pnar, Khasi wa kamjooh hei ktien English.

Kam u bru wa thrang angnood u kyntu kynrong yei ktien Pnar da embynta u wow kreh kam uwi na kiwa thoh yong ka kot khubor U Naphang chirup wow Dr. B.S. Challam wei daman u leh uwi na kiwa thoh khubor yong ka Meghalaya Guardian, Sentinel, Dongmusa wei daman u leh uwi na kiwa pynmih ya ka kot khubor U Trechnong.

U S. Quotient Sumer man u leh u dkhot ka All India Radio Shillong, u dkhot ka Sahitya Akademy kawi na ki seiñ wa heh ka ri India heiyatoh wow pynneh pynsah yei ktien i thylliej yong ki jaitbru waphær hapoh ka ri India neitæ da embynta u leh wow kreh ha kiwa boon ki seiñ kiwa kynthup ya ka Kiang Nangbah Iasiat Khnam Memorial Society, Hynniewtrep Welfare & Cultural Organisation, Meghalaya Editor & Publisher Association, Jaiñtia Hills District Legal Service Authority, Khasi Author Society wa kiwi kiwi.

Ha ka Dong Panaliar da jooh ksoh kaam u kam u General Secretary neitæ ha u snem 1987 da jied leh ya oo wow man kam u Ward Commissioner næ uwa mihkhmat na ka dong Panaliar cha ka Jowai Town Committee.

Kam u bru wa emsap hei liang i thoh kot da ye u wow pynmih pyrthai ya ki kot wa da thoh hei ktien Pnar, ktien Khasi wa English, kiwa kynthup ya ka kot parom chaphang U Kiang Nangbah, Ka Parom Patein Syiem Ka Ri Jaiñtia, U Harip Wow Saek, Ka Hima Ka Jingieid, Ka Koit Ka Khiah Bad Ki Aiñ Jong Ka, Ka Kheinkur Kheiñjait U Jaiñtia Pnar, The Enchanting Life & Culture of Jaiñtia wei ya kani ka kot da pynmih da ka DIPR chirup wei yakrehlang u tynrawde, u waheh Shining Star Laloo wei kawa khaddooh wa da pynmih u hadien wa wan ka khlam COVID-19 toh kawa e pyrtuid The Legend of Harip & Saek.

Halyndet ki kaam wa da leh u waheh S. Quotient Sumer sñiawsuk wei sñiawsarong leh u tip wa da yoh u chiboon ki Award waphær kiwa kynthup ya ka Meghalya State Award, Art & Literature, Writer & Composer Award wa da yoh u na ka North Eastern Hill University, Shillong, ka Award na ka Directorate of Art & Culture, Meghalaya, Dr. Ambedkar Fellowship Award, Khasi Author Society Award, Jeebon Roy Memorial Award, Senior Citizen Award, North East TV Film Producer & Director Award, Lifetime Achievement Award wei kawa khaddooh ka Award wa yoh u toh ka “My Home India Award” ha Mumbai. 

Kam ka dak i burom khaddooh yow waheh S. Quotient Sumer wa man u Khai u Pyiar ka Ri wa ka Jaitbru ha ka 1 Duyatra 2023 hapyrdi i sakhilang kiwa boon ki paidbah najan najngai da pynman ka yalang hei pynlai u Ribait-O Pde heiwa u waheh Myown Chyrmang da siang u ki kyntien Ngoohblai Ngoohsyiem katwa u Requoma Rq. Laloo neibynta i burom u pa wa maya yong ki e u i klam i kappæ wei yñiawtang ya ki kaam kiwa u S. Quotient Sumer da leh u kam u Kñi u Pa wa em ka yurim wa ka lyngkor wa khia u kit u bah, da yoh leh i klam na ka yung waheh u Lamiooki Sumer; ha u Loom u Pdeiñ, ka Raij ka chnong wa da pynsñiaw da u waheh O.R. Challam, President Seiñraij Jowai; neibynta i burom ka Kiang Nangbah Iasiat Khnam Memorial Society, Jowai da mihkhmat da u waheh Pearlet Toi, President KNIMSJ katwa neiliang ka Meghalaya Editor & Publisher Association kamjooh ka Jaiñtia Journalist Association da mihkhmat da u waheh M.M. Thaiang.

Leave a Comment